बेइजिङ । चीनमा बसेर पत्रकारिता गर्दै आएका तीन अमेरिकी पत्रिकाका पत्रकारलाई देश निकाला गर्ने भएको छ ।
चीनको विदेश मन्त्रालयले बुधबार अमेरिकी पत्रिकाहरु न्यूयोर्क टाइम्स, वाल स्ट्रिट जर्नल र वाशिंटन पोष्टका अमेरिकी पत्रकारहरुलाई १० दिन भित्र पत्रकारिता अनुमतिपत्र फिर्ता गरी देश छाड्न निर्देशन जारी गरेको हो ।
चीनको यो कदमबाट यी तीन पत्रिकामा काम गर्ने कम्तीमा १३ पत्रकारहरु देश निकालामा पर्ने अन्तर्राष्ट्रिय सञ्चारमाध्यमले जनाएका छन् । यद्यपि चिनियाँ विदेश मन्त्रालयले भने पछिल्लो कदमबाट प्रभावित हुने पत्रकारहरुको संख्या भने खुलाएको छैन ।
कागजात खोसिएका पत्रकारहरुले चीनको विशेष प्रशासन क्षेत्र मकाउ र हङकङमा बसेर पनि पत्रकारिता गर्न पाउने छैनन् ।
चीनमा आधारित रही पत्रकारिता गर्दै आएका विदेशी पत्रकारको समूह फोरेन करेस्पोन्डेन्ट क्लब अफ चाइनाले भने चिनियाँ कदमको आलोचना गरेको छ । अमेरिकी विदेशमन्त्री माइक पोम्पेओले पनि चिनियाँ कदमलाई दुर्भाग्यपूर्ण भन्दै यसबाट पछि हट्न चीनलाई आग्रह गरेका छन् ।
यसअघि पनि चीनले चिनविरुद्ध घृणा फैलाउने लेख लेखेको भन्दै तीन पत्रकारलाई देश निकाला गरेको थियो । यससँगै अमेरिकाले चिनियाँ सञ्चारमाध्यमहरुलाई विदेशी निकायहरुजस्तै दर्ता हुनुपर्ने प्रावधान लागू गरेको थियो ।
पछिल्लो समय चीन र अमेरिकाबीच कोरोना भाइरसका विषयलाई लिएर बाकयुद्ध चर्किरहेका बेला चीनले अमेरिकी पत्रकारहरुको कागजात खोस्ने निर्णय गरेको हो ।
गत सोमबार अमेरिकी राष्ट्रपति डोनाल्ड ट्रम्पले चीनबाट शुरु भएको कोरोना भाइरसलाई ‘चिनियाँ भाइरस’ भनेपछि चीन क्रुद्ध बनेको थियो । त्यसको केही दिनअघि चिनियाँ विदेश मन्त्रालयका एकजना प्रवक्ताले वुहान शहरमा कोरोना भाइरस ल्याउन अमेरिकी सेनाको हात रहेको हुनसक्ने आरोप लगाएका थिए ।
दुई मुलुकहरु एक–अर्काका सञ्चारमाध्यमलाई पनि शंकाको दृष्टिले हेर्दै आएका छन् । चीनले निकै लामो समयदेखि अमेरिकी सञ्चारमाध्यमले चीनविरोधी भावना फैलाउने गरी समाचार सार्वजनिक गर्ने गरेको आरोप लगाउँदै आएको छ ।
अर्कोतर्फ अमेरिकाले भने चिनियाँ सञ्चारमाध्यमहरुले चिनियाँ कम्युनिष्ट पार्टीको प्रोपागाण्डा गर्ने गरेको आरोप लगाउने गरेको छ ।
