सोल, दक्षिण कोरिया– दक्षिण कोरियामा पछिल्लो दिनहरुमा कोरोना भाइरसको संक्रमण दर तीब्र रुपमा बढ्दा कोभिड–१९ को संक्रमण नियन्त्रण बाहिर जान सक्ने भन्दै उच्च सतर्कता अपनाउन अनुरोध गरिएको छ ।
कोरियाको मूख्य क्षेत्रहरु सोल, बुसान, इन्छन र ख्याङगीदो प्रान्तमा संक्रमणको दर तीब्र गतिमा फैलिएको हुँदा सरकारले कोरोनाको स्थिति नियन्त्रण बाहिर जान सक्ने भन्दै सम्पूर्ण नागरिकहरुलाई सामाजीक दूरी कायम गरी सुरक्षित रहन अनुरोध गरेको हो ।
गत सोमबार मात्र २ सय ४६ देखि बढेर बुधबार २ सय ८३ दक्षिण कोरियामा संक्रमित पाइएको छ भने कोरिया बाहिरबाट भित्रिने क्रममा १४ जनामा संक्रमण देखिएको छ। दक्षिण कोरियामा बुधबारसम्म जम्मा गरी १६ हजार ३ सय ५५ जना संक्रमित पाइएको छ । त्यस्तै १४ हजार ७८ जना निको भएका छन् भने हालसम्म ३ सय ६ जनाको मृत्यु भएको कोरियाली रोक तथा प्रकोप नियन्त्रण केन्द्रले जनाएको छ ।
नेपालीहरुको आकर्षक रोजगारीको गन्तव्यको रुपमा रहेको दक्षिण कोरियामा संक्रमणको त्रास भएपछि नेपाली कामदारहरु पनि त्रसित मानसिकताको साथ काम गरिरहेका छन् । कोरियाबाट छुट्टीमा नेपाल आएका धेरै कामदारको लकडाउनको कारण समयमा फर्कनु नपाएपछि रोजगारी गुमेको छ भने कोरियन भाषा परीक्षा उत्तीर्ण गरि उड्न तयारी अवस्थामा रहेका थुप्रै संख्यामा नेपालीहरु नेपालमै अड्किएका छन् ।
