मुम्बई । लागुऔषधको मुद्दामा पक्राउ परेकी अभिनेत्री रिया चक्रवर्तीको जमानतका लागि गरेको अपिल उच्च अदालते अस्वीकार गरेको छ ।
भारतीय सञ्चारमाध्यमका अनुसार रियाले बाँकी दोषीहरुलाई सचेत गराउने र प्रमाणहरु नष्ट गर्न सक्ने सम्भावना भएकोले जमानतका लागि दिएको अपिल निवेदन उच्च अदालतले खारेज गरिदिएको हो । जमानत निवेदन खारेज भएसँगै उनी ८ अक्टोबरसम्मका लागि न्यायिक हिरासतमै रहने भएकी छन् ।
सुशान्त सिंह राजपूतको मृत्यु प्रकरणको अनुसन्धानका क्रममा लागुऔषधको मुद्दामा उनलाई सेप्टेम्बर ८ मा एनसीबीले पक्राउ गरेको थियो । ११ सेप्टेम्बरमा उनले जमानतका लागि पहिलो पटक गरेको अपिल खारेज भएको थियो ।
रियासहित एनसीबीले उनका भाई सोविक चक्रवर्ती, बसित परिहार र सुशान्तका घरमा काम गर्ने कामदार दिपेश सावन्त र अपार्टमेन्ट म्यानेजर साम्युएल मिरान्डालाई पनि पक्राउ गरेको थियो । अहिले उनीहरु पनि हिरासतमा नै छन् । उनीहरुले एनडीपीएस मुद्दामा बम्बई उच्च अदालतमा जमानत निवेदन दायर गरेको छ । यसको सेप्टेम्बर २३ मा सुनुवाइ हुँदैछ ।
