बिर्तामोड । पूर्वपश्चिम राजमार्ग अन्तर्गत झापाको सुरुङ्गामा तीनवटा सवारीसाधन ठोक्किँदा दुईजनाको मृत्यु भएको छ ।
कनकाई नगरपालिका–४ सुरुङ्गास्थित कोटीहोम नजिकै बुधबार दिउँसो भएको दुर्घटनामा छ जना घाइतेमध्ये ४ जनाको अवस्था चिन्ताजनक छ ।
ग्यास बोकेको ट्रक, कार र मोटरसाइकल आपसमा ठोक्किँदा कार चालकसहित कारमा सवार युवकको ज्यान गएको जिल्ला प्रहरी कार्यालय झापाले जनाएको छ ।
प्रहरी नायव उपरीक्षक (डिएसपी) राकेश थापाका अनुसार कार चालक सुनसरीको धरान उपमहानगरपालिका १६ बस्ने २८ वर्षीय दीपक क्षेत्री र कारमा सवार सोलुखुम्बु पासाङ गाउँपालिका १ बस्ने ३० वर्षीय दिलीप राना मगर ज्यान गएको हो ।
उनीहरूको उपचारका क्रममा बिर्तामोडस्थित बिएण्डसी अस्पतालमा मृत्यु भएको प्रहरीले जनाएको छ । पश्चिमबाट पूर्वतर्फ जाँदै गरेको को १ ख १६८४ नम्बरको ग्यास बोकेको ट्रकले उछिन्ने क्रममा विपरित दिशाबाट आउँदै गरेको प्रदेश १–०४–००१च ०१६७ नम्बरको कार र प्रदेश १–०१३ प १७८३ नम्बरको मोटरसाइकलसँग ठोक्किँदा दुर्घटना भएको हो ।
दुर्घटनामा परी कारमा सवार चार र मोटरसाइकलमा सवार दुई गरी ६ जना घाइते भएका छन् । उनीहरूको बिएण्डसी अस्पतालमा उपचार भइरहेको छ । दुर्घटना परेका तीन वटै सवारीसाधन इलाका प्रहरी कार्यालय सुरुङ्गाले नियन्त्रणमा लिएको छ ।
