काठमाडौं– नेपाली चलचित्रको इतिहासमै पहिलोपटक लागू भएको ‘बक्स अफिस प्रणालीको लागू भएसँगै यसअघि चलचित्र क्षेत्रका विभिन्न पक्षले वास्तविकता लुकाएर आफ्नो पेट भर्ने ढाँटको खेल सकिएको छ । हाल राजधानीका २० वटा हलबाट सुरु भएको बक्स अफिस प्रणाली तत्कालै देशभरका हलमा विस्तार पनि गरिने भएको छ ।
कतिपयमा भने बक्स अफिस लागू भएपछि के परिवर्तन आउँछ भन्ने कतिपयमा अन्योल देखिएको छ । सरल भाषामा भन्नुपर्दा बक्स अफिस भनेको टिकट काट्ने काउन्टर हो । कुनै पनि दर्शकले हलमा पुगेर जब कुनै चलचित्रका लागि टिकट काट्छ, त्यही स्थानलाई बक्स अफिस भनिन्छ । तर, यसमा केही प्राविधिक पक्ष पनि जोडिएका हुन्छन् ।
हलमा २ प्रकारले टिकट बिक्री हुन्छ । एउटा म्यानुअल र अर्को डिजिटल । बक्स अफिस सर्भरका लागि ई–टिकेटिङ अनिवार्य चाहिन्छ ।
साउन १ गतेबाट सुरु भएको प्रणाली, ई–टिकेटिङसँगै डाटा सेन्टर सर्भिस हो । अर्थात, ई–टिकेटिङ मार्फत टिकट विक्री गर्दै आएका सम्पूर्ण हलको व्यापारको रिपोर्ट अब एउटा सर्भरमा केन्द्रित हुन्छ । यसबाट हरेक हलमा विक्री हुने टिकटको संख्या निर्माताले अनलाइनमार्फत सोही समयमा थाहा पाउन सक्छन् । एउटा शोमा ई(टिकेटिङ जडित कुन हलबाट कति कारोबार भयो भन्ने निर्माताले मोबाइबाटै थाहा पाउन सक्छन् ।
बक्स अफिस लागू भएपछि अब विगतमा जसरी चुरोटको बट्टामा व्यापारको विवरण लेखेर हलवालाले निर्मातालाई बुझाउने परिपाटी अन्त्य हुने र चलचित्रको व्यापार पारदर्शी हुने विश्वास लिइएको छ ।
आफ्नो फिल्मको व्यापार हेर्न निर्माताले बक्स अफिस लग इन गर्नुपर्नेछ । यसमा प्रवेश गरेपछि आफूलाई प्राप्त युजर नेम र पासवोर्ड हालेर आफ्नो चलचित्रको व्यापार हेर्न सकिन्छ ।
बक्स अफिसमार्फत पाइने व्यापारको आँकडा निर्माता, प्रदर्शक, हल सञ्चालक र राज्यले हेर्न सक्छन् । निर्माताले चाहेको खण्डमा अन्य व्यक्तिलाई अधिकार दिन सक्नेछन् । यसका लागि निर्माताले चलचित्र सेन्सर भएको प्रमाणपत्र, आफ्नो चलचित्रको रिलिज डेट, बितरकको नाम सहितको विवरण चलचित्र विकास बोर्डलाई बुझाउनुपर्नेछ ।
त्यसैगरी बक्स अफिस नभएकै कारण पीडित बनेको भन्दै गुनासो गर्ने धेरै फिल्म निर्मातालाई पनि अब राहत भएको छ । हलवाला र वितरकले आर्थिक हिनामिना गर्ने गरेको र चलचित्रको कारोबार अनुसारको व्यापारिक रिपोर्ट नआएको उनीहरुको गुनासो रहँदै आएको थियो ।
बक्स अफिस लागू भैसकेपछि निर्मातालाई फाइदा त पुग्छ नै त्यससँगै फाइदा राज्यलाई हु्न्छ ।
