वासिङ्टन– अमेरिकी राष्ट्रपति डोनल्ड ट्रम्पले मङ्गलबार मूलधारको सञ्चारमाध्यमलाई ‘शत्रु’ र ‘प्रतिपक्षी दल’ को संज्ञा दिएका छन् ।
ट्रम्पको निर्वाचन अभियानमा रूसी साँठगाँठबारे वर्तमान राष्ट्रपतिमाथि लागेको आरोपको छानबिन गरी हालै प्रतिवेदन पेश गरेका अमेरिकी सङ्घीय अनुसन्धान विभागका पूर्वनिर्देशक रोबर्ट म्युलरको प्रतिवेदनले ट्रम्पलाई उक्त मुद्दामा दोषी नभेटिएको भन्ने निष्कर्षपछि ट्रम्पको यो भनाइ आएको हो ।
उनले पत्रकारहरूले अमेरिकी निर्वाचनमा रूसी हस्तक्षेपबारे भएको अनुसन्धान रिपोर्टलाई न्यायसङ्गत रूपमा प्रस्तुत नगरेको आरोप लगाएका छन् ।
“विश्वभर मूलधारका सञ्चारमाध्यमहरू भ्रष्ट र मिथ्या बनेकाले उनीहरूप्रति जनताको आक्रोश र घृणा प्रकट गर्ने गरेका छन्,” अमेरिकी राष्ट्रपति ट्रम्पले ट्वीटर सन्देशमार्फत भनेका छन् “राष्ट्रपति अभियानमा रूसी साँठगाँठको मुद्दालाई विगत दुई बर्षसम्म भ्रमित गर्ने प्रयास सञ्चारमाध्यमले गरे यद्यपि उनीहरूलाई निर्वाचनमा रूससँग कुनै साँठगाँठ नरहेको जानकारी थियो ।”
“उनीहरू साँच्चै जनताका शत्रु र वास्तविक प्रतिपक्ष हुन् ।” एएफपी
