काठमाडौं । नेपालका लागि नेपाली अभियानले सामाजिक अभियन्ता ज्ञानेन्द्र शाही र पत्रकारमाथि हमला गर्नेहरुलाई तत्काल कारबाहीको माग गरेको छ ।
नेपालका लागि नेपाली अभियानका तर्फबाट सुरेन्द्र भण्डारीले एक विज्ञप्ति जारी गर्दै ज्ञानेन्द्र शाहीले आयोजना गरेको पत्रकार सम्मेलनमा नेकपाका विद्यार्थीहरु जवरजस्ती घुसपैठ गरी पत्रकार भेटघाट कार्यक्रम भाँडेको तथा पत्रकार र ज्ञानेन्द्र शाहीमाथि हातपात भएको भन्दै दुख व्यक्त गरेको छ ।
यो घटनाले मानव अधिकार र मौलिकहकको राज्यद्वारा जघन्य रुपमा उल्लंघन भएको जनाइएको छ ।
घटनाका दोषिलाई गिरफ्तार नगर्ने र कारवाही नगर्ने तर निर्दोष शाहीलाई सुरक्षाको नाममा प्रहरी नियन्त्रणमा राखि छोड्न पूर्व एसपी दिलिप बस्नेतलाई जमानीको कागज गराएर पनि नछोड्ने र उल्टै शाहीमाथि अभद्र व्यवहारमा मुद्दा चलाउने सरकारी कार्यबाट कानूनको शासन पराजित भएको विज्ञप्तिमा जनाइएको छ ।
विज्ञप्तिमा सरकारले ज्ञानेन्द्र शाहीलाई सुरक्षित गर्ने जिम्मा लिनुपर्ने, हमलाकारीमाथि कारवाही गर्नुपर्ने, झुठ बोल्ने र आफ्ना कार्यकर्ता परिचालन गरि गुण्डागर्दी गराउने मन्त्री योगेश भट्टराईले यात सार्वजनिक रुपमा माफी माग्नुपर्ने या उनलाई मन्त्री पदबाट बर्खास्त गर्न माग गरिएको छ ।
