भारतले गत साता जारी गरेको नक्साविरुद्ध नेत्रविक्रम चन्द ‘विप्लव’ निकट विद्यार्थीहरुले प्रदर्शन गरेका छन् । भारतले नेपाली भूमि आफ्नो नक्सामा समेटिएको विरोधमा विप्लव नेतृत्वको अखिल क्रान्तिकारी सेती महाकाली समन्वय समितिले सदरमुकाम महेन्द्रनगरमा प्रदर्शन गरेको हो ।
अखिल क्रान्तिकारीले सिद्धनाथ विज्ञान क्याम्पस, स्थानीय ट्राफिक चोक र जिल्ला प्रहरी कार्यालय छेउबाट छुट्टाछुट्टै र्याली निकालेको थियो । कालापानी, लिम्पियाधुरा र लिपुलेकलाई भारतले आफ्नो नयाँ नक्सामा समावेश गरेको विरोधमा निकालिएका तीन वटै र्याली मदन चोकमा पुगेर कोणसभामा परिणत भएको थियो ।
कोणसभालाई अखिल क्रान्तिकारी केन्द्रीय सदस्य बबरजंग सिंह र कञ्चनपुरका अध्यक्ष नरेन्द्र भाटले सम्बोधन गरेका थिए ।
