कोशी नदीमा पानीको सतह बढ्दै गएपछि तटीय क्षेत्रमा बाढी र डुवानको खतरा बढेको छ । बाढी पूर्वानुमान शाखाका अनुसार मंगलबार बिहानसम्म कोशी नदीको जलसतहले सतर्कता तह पार गरेको छ ।
सप्तकोशी नदीमा पानीको शतहले समान्यभन्दा बढेर ६।२२ मिटर पुगेको शाखाले जनाएको छ । कोशी नदीमा पानीको शतह ६ मिटरभन्दा माथी पुगेमा सतर्कता तह पार गरेको मानिन्छ ।
पानीको सतहले ७ मिटर पार गरेमा खतरापूर्ण मानिन्छ । शाखाका अनुसार कोशी नदीको चतरामा जलसतहले सतर्कता पार गरिसकेको छ ।
चतरा क्षेत्रमा जल सतह बढ्दा सुनसरी र सप्तरी जिल्लाका तटीय क्षेत्रमा डुवान तथा बाढीको खतरा बढेको शाखाले जनाएको छ ।
शाखाका अनुसार पहाडी क्षेत्रमा वर्षा हुने क्रम जारी रहेकाले नदीमा पानीको सतह अझै बढ्ने संभावना छ ।
बाढी पूर्वानुमान शाखाले मंगलबार बेलुकीसम्म उच्च सतर्कता अपनाउन कोशी तटीय क्षेत्रका बासिन्दालाई आग्रह गरेको छ ।
