भारत । दक्षिण भारतको केरला राज्यको एउटा आवासीय भवनमा बस्ने मानिस धाराहरूबाट बियर, ब्रान्डी र रम मिसिएको पनी आएपछि अचम्भित भएका छन् ।
सोमवार बिहान उनीहरूको भान्साका धारामा अचानक रक्सीको गन्ध आउने खैरो पानी आएको थियो ।
धाराबाट रक्सीको गन्धसहितको पानी आएपछि उनीहरु सरकारी अधिकारीसमक्ष गुनासो लिएर पुगेका थिए ।
छानबिनको क्रममा उनीहरूले पानी तान्ने गरेको इनारको पानी दुर्घटनावश दूषित भएको पाइएको बीबीसीले उल्लेख गरेको छ ।
इनारनजिकै अधिकारीहरूले जफत गरेको ६,००० लिटर मदिरा नष्ट गरेर पोखिएको र त्यसकै कारण समस्या निम्तिएको पाइएको अधिकारीहरुले जनाएका छन् ।
अदालतको आदेशपछि जफत गरिएको मदिरालाई नजिकै एउटा खाल्टोमा हालिएको थियो। तर त्योपछि नजिकैको इनारमा पुग्न गएको रहेछ ।
त्यहाँ रहेका इनारबाट केरलाको त्रिस्सूर जिल्लास्थित आवासीय भवनका १८ वटा फ्ल्याटमा पानी तान्ने गरिएको रहेछ ।
उक्त आवासीय भवनका मालिक जोशी मालिएक्कले बीबीसीसँग भने, “हामी त छक्कै पर्यौँ।”
तर कडा गन्ध आएको पानी मानिसहरूले प्रयोग गरेनन् ।
पिउन र कपडा धुन पानी नभएपछि समस्या पनि भयो। मालिएक्कलले भने, “बच्चाहरू विद्यालय जान पाएनन् र उनीहरूका आमाबाबु काममा जान पाएनन्।”
त्यहाँका बासिन्दाले उजुरी गरेपछि अधिकारीहरूले तुरुन्तै आफ्नो गल्ती सुधार्न काम थालिहाले। तर पानी तानेर इनार सफा गर्न महिनौँ लाग्ने देखिएको छ।
मालिएक्क लले भने, “अहिले दैनिक ५,००० लिटरजति पानी आपूर्ति गर्ने व्यवस्था गरिएको छ। तर त्यो त्यहाँ बस्ने सबैलाई पर्याप्त हुँदैन।”
सरोकारवाला निकायका अधिकारीहरूले बीबीसीको प्रश्नको उत्तर दिएका छैनन् । केरला भारतमा सर्वाधिक मदिरा खपत हुने राज्य हो।
