४०औं पर्यटन दिवसलाई लक्षित गर्दै ललितपुर महानगरपालिकाले विशेष कार्यक्रम गर्ने भएको छ ।
शुुक्रवार अर्थात् आजदेखि सोमबारसम्म दरबार क्षेत्र परिसरमा रहेका रेष्टुरेन्ट, क्याफे तथा अतिथि र हस्तकला पसलहरुमा विशेष छुट दिने व्यवस्था गरेको छ ।
ललितपुर महानगरपालिकाले पाटन दरबार क्षेत्रमा शुक्रवार सबैभन्दा पहिला प्रवेश गर्ने २५ जना पर्यटकलाई निशुल्क प्रवेश व्यवस्था गर्ने भएको छ ।
त्यसैगरी त्यसपछि प्रवेश गर्ने अन्य २० जना सम्मलाई ५० प्रतिशत प्रवेश शुल्क मिनाहा गर्ने महानगरले जनाएको छ ।
४० औं विश्व पर्यटन दिवसको अवसरमा यस्तो व्यवस्था ल्याएको महानगरका सँस्कृति, पर्यटन तथा सम्पदा संरक्षण केन्द्रका प्रमुख सहजित राईले बताए ।
पर्यटकका लागि भोलि बिहान महानगरका प्रमुख चिरीबाबु महर्जन र उपप्रमुख गीता सत्यालले स्वागत गर्ने कार्यक्रम समेत रहेको छ ।
पुरुष पर्यटकलाई टोपी र महिला पर्यटकलाई दोसल्ला ओढाएर सहयोग गर्ने तयारी भएको र पर्यटन शुल्क व्यवस्थापन तथा कार्यान्वयन समितिको सदस्य सचिव विमल केशरी अमात्यले जानकारी दिइन् ।
ज्यापू समाज, बोद्ध बिहार संघ, चाइनिज गाइड एसोसियसन लगायतका संघसंस्थाको सहयोगमा उक्त कार्यक्रम हुन लागेको हो ।
शुक्रवार बिहान ७ बजेदेखि आयोजना हुने उक्त कार्यक्रममा ज्यापू नाच, लाखे नाच, धिमे बाजा प्रदर्शन, धाः बाजा प्रदर्शन गरिने भएको छ ।
साथमा चरिया नाच समेत रहेको छ ।
