काठमाडौं– सभामुख अग्निप्रसाद सापकोटाको अध्यक्षतामा बिहीबार बसेको कार्यव्यवस्था समितिको बैठकले कोरोना संक्रमण नभएको रिपोर्ट नआएसम्म संसद बैठकमा सहभागी हुन नपाउने भएका छन् ।
रिपोर्ट नेगेटीभ देखाएपछिमात्र सांसदहरुलाई हलभित्र प्रवेश गर्न दिने निर्णय गरेको हो । कुनै सांसदमा कोरोना संक्रमण पाइएमा हलमा छिर्न पाउने छैनन् ।
संघीय संसदको बजेट अधिवेशनको पूर्वसन्ध्यामा बिहीबार सांसद र कर्मचारीको कोरोना परीक्षणका लागि स्वाब संकलन गरिएको छ । पीसीआर परीक्षण रिपोर्ट शुक्रबार बिहानसम्म आइसक्ने जनाइएको छ ।
कोरोना परीक्षण नभएका सांसदहरु भने शुक्रबार बस्ने बैठकमा सहभागी हुन पाउने छैनन् । स्वाब संकलन गर्न बाँकी रहेका सांसदको कोरोना परीक्षण शुक्रबार बिहान गरिने छ ।
यस्तै, समितिले संसद अधिवेशन सुरु भइसकेपछि कुनैपनि सांसदलाई काठमाडौं छाडेर निर्वाचन क्षेत्र जान नदिने निर्णयसमेत गरेको छ ।
