काठमाडौं– प्रेस काउन्सिल नेपालका कार्यवहाक अध्यक्षद्वारा प्रकाशित जनआस्था साप्ताहिक विरुद्ध ‘चौधरी ग्रुप’ले आज प्रेस काउन्सिलमा उजुरी दर्ता गरेको छ । प्रतिनिधि सभाका सदस्य एवं चौधरी ग्रुपका अध्यक्ष विनोद चौधरीको चरित्र हत्या भएको भन्दै काउन्सिलमा उजुरी दिइएको बताईएको हो ।
उक्त पत्रिकाले विगत लामो समयदेखि नेपालका ख्यातीप्राप्त उद्यमी चौधरीका बारेमा झूठा समाचार प्रकाशित गर्दै आएपछि पीडित भएको भन्दै उजुरी दिएको चौधरी ग्रुपको कर्पोरेट कम्युनिकेशन विभागले जनाएको छ ।
पछिल्लो समयमा जनआस्थाले ‘अर्थमन्त्री र प्रधानमन्त्रीको रहस्यमय मौनताः चौधरीद्वारा रातारात अरबौँ बाहिरिएको खुलासा’ र ‘अर्बपतिको ‘मुहान’मा बल्ला आक्रमण’ शिर्षकमा समाचार प्रकाशित गरेको थियो । ति पूर्णतया झुठा समाचार रहेको चौधरी समुहले काउन्सिलमा दिएको उजुरीमा उल्लेख छ ।
तथ्यहिन समाचार प्रकाशित गरेर चौधरी ग्रुपका अध्यक्षको राष्ट्रिय एवं अन्तर्राष्ट्रियस्तरमा रहेको ख्यातीमा प्रतिकुल प्रभाव पार्ने दुस्प्रयास गरिएको भन्दै चौधरी ग्रुपले जनआस्था साप्ताहिक तथा उक्त पत्रिकाका सम्पादक किशोर श्रेष्ठमाथि प्रेस काउन्सिल ऐन, २०४८ को दफा १२ बमोजिम हदैसम्मको सजाय माग गरेर उजुरी दिएको छ ।
