जनकपुरधाम । महोत्तरीको भंगहा नगरपालिका–८ धरमपुरबाट सम्पर्कविहीन भएका बालिका भारत बिहारको सीतामढीमा फेला परका छन् ।
घरबाट घाँस काट्न गएका किशोरी लहलहैमा भारत पुगेको बुझिएको छ । भारतीय प्रहरी समक्ष उनीहरुले दिएको बयान अनुसार किशोरीहरु लहलहैमा भारत पुगेको पाइएको महोत्तरी प्रहरीले जनाएको छ ।
ती किशोरी कसैले फकाएर भारत तर्फ लगेको प्रहरीले अनुमान गरेपनि उनीहरुसँग कोही व्यक्ति फेला नपरेको प्रहरीले जनाएको छ ।
किशोरीहरुले भारतीय प्रहरीलाई दिएको बयानमा आफूहरु गायिका बन्न भारत आएको बताएको भारतीय प्रहरीलाई उदृत गर्दै महोत्तरीका प्रहरी उपरीक्ष दिनेश अर्चायले जानकारी बताए ।
आचार्यले उनीहरुलाई भारतीय प्रहरीले सीतामढी रेल्वे स्टेसनबाट फेला पारेको बताए । उनीहरुको साथमा अरुकोही नभेटिएकाले अरुको उक्साहटमा नभई आफैँ गएको जस्तो देखिएको प्रहरीले जनाएको छ ।
भारतबाट उद्धार गरी ल्याइएका किशोरी दिउँसो २ बजे महोत्तरी आइपुग्ने र परिवारको जिम्मा लगाइने जिल्ला प्रहरी कार्यालय महोत्तरीले जनाएको छ ।
भंगहा नगरपालिका ८ धरमपुरकी ११ वर्षीया अर्चना पासवान, १२ वर्षीया सीमा पासवान , १२ वर्षीया रञ्जना पासवान, १३ वर्षीया ज्योती पासवान, १३ वर्षीया रीया पासवान, १७ वर्षीया नगीना पासवान र २० वर्षीया अस्मिता पासवान बेपत्ता भएका थिए ।
उनीहरु मंगलबार दिउँसो घाँस काट्न साही नगरपालिकाको ९ अजगैवास्थित पुगेको बेलादेखि बेपत्ता भएका थिए ।
किशोरी बेपत्ता भएको खबरपछि परिचालित प्रहरीले भारतीय प्रहरीको सहयोगमा फेला पारेको हो । उनीहरुको खोजीमा प्रदेश प्रहरीका प्रहरी इन्सपेक्टर उमाशंकरप्रसाद साहको टोली सितामढी पुगेको थियो ।
