काठमाडौं– लोक सेवा आयोगले स्थानीय तहको कर्मचारीका लागि लिएको परिक्षाका क्रममा खोटाङमा प्रश्नपत्र च्यात्ने आदीवासी जनजाती महासंघका चार जना कार्यकर्तालाई शनिबार बिहान प्रहरीले पक्राउ गरेको छ ।
जनताको विरोध गर्न पाउने अधिकारको रक्षा गर्न भन्दै समाजवादी पार्टी नेपाल खोटाङले जिल्लामा पक्राउ परेका ४ जना युवाहरुलाई तत्काल रिहाई गर्न माग गरेको छ । हाल चलिरहेको लोकसेवा आयोगको असमावेशी विज्ञापन खारेजीको माग गर्दै चलिरहेको शान्ति पूर्ण आन्दोलनमा एक्यवद्धता जनाई रहेको समाजवादी पार्टीले राज्यले दमनको नीति लिएकोमा विरोध जनाएको हो ।
आदीवासी जनजाति, दलित, महिला, अपाङग, मधेसी, मुस्लिमलगायतको अधिकारलाई कटौती गर्दै संविधानको भावना र मर्म विपरित लोकसेवा आयोगले खुलाएको विज्ञापनको विरोधमा एक नम्बर प्रदेश बन्दको आव्हान गरिएको थियो । बन्द गराउने क्रममा दिक्तेल बजारबाट आदीवासी जनजाति महासंघ जिल्ला परिषदका सचिव रबिन खम्बु, महासंघका सह–सचिव एलबी मगर, खोटाङ दलित विकास मञ्चका अध्यक्ष मिलन चाहार र सविना अछामेलाई तत्काल रिहाई गर्न पार्टीले प्रेषित विज्ञप्तीमा लेखिएको छ ।
बिहान ७ बजेदेखि प्रदेश १ का तीनवटा केन्द्रहरु खोटाङ, धनकुटा र इलाममा परीक्षा सञ्चालन गरेको छ । खोटाङको सदरमुकामस्थित दिक्तेल बहुमुखी क्याम्पमा रहेको परीक्षा केन्द्रमा परीक्षा सुरु हुनै लाग्दा केही थान प्रश्नपत्रहरु उनीहरूले च्यातेका थिए ।
आदिवासी जनजाति महासंघका खोटाङ जिल्ला सचिव रविन खम्बु, सहसचिव एलबीमगर, दलित विकास मञ्चका मिलन चाहार र सविना अछामीलाई प्रहरीले पक्राउ गरेको हो ।
स्थानीय तहमा प्रशासन समूहतर्फ र लेखा समूहतर्फ अधिकृत र सहायक पदका लागि खोटाङबाट २१४ जनाको दरबन्दस्का लागि परीक्षा भइरहेको छ भने धनकुटामा ४९१ र इलाममा २३० गरी ९३५ जनाका लागि शनिबार परीक्षा भइरहेको छ ।