इस्तानबुल– टर्कीले जुलाई १२ पछि गैरकानूनीरूपमा स्तानबुल हुँदै यूरोप तथा अमेरिका जान लागेका १६ हजार ४२३ आप्रबासीलाई सम्बन्धित देशमा नै फिर्ता गर्ने भएको टर्कीका अधिकारीले बताएका छन् ।
इस्तानबुल गभर्नर कार्यालयले दिएको जानकारीअनुसार सुरक्षाकर्मीले पक्राउ गरेका आप्रबासीमध्ये चार हजार ५०० सिरियाली नागरिक रहेका बताइएको छ ।
उनीहरूसँग कुनै किसिमको औपचारिक कागजात नरहेकोले सबैलाई विभिन्न प्रान्तका अस्थायी शरणार्थी शिविरमा पठाइएको छ ।
सरकारले समातिएका आप्रवासीलाई स्वदेश फर्किनका लागि आगामी अक्टोबर ३० सम्मको समय दिएको बताइएको एक सिरियाली गैरसरकारी संस्थाले जनाएको छ ।
टर्कीले यस पहिले (अगस्ट २०) सम्ममा सिरियाली शरणार्थीलाई स्वदेश फिर्ता हुन आग्रह गरेका थिए ।
टर्कीका अधिकारीले दिएको जानकारी अनुसार इस्तानबुलमा १० लाख छ हजार शरणार्थी रहेका तथ्याङ्क छ । जसमध्ये पाँच लाख ७० हजार शिरियाली शरणार्थी भएको बताउने गरिएको छ ।
टर्कीको अन्य शहर अङ्कारा र बुर्सामा पनि शरणार्थीको भीड बढेको भन्दै सरकारले इस्तानबुलमा जस्तै कारबाही गर्ने तयारी गरेको टर्कीका आन्तरिक मामिला मन्त्री सुलेमान सोयलुले बताए ।
गरिबी र द्वन्द्वको पीडाले अरब मुलुक लिबिया, सिरिया, यमन तथा केही एशियाली मुलुकका नागरिकले यूरोप र अमेरिका प्रवेशका लागी खतरनाक सामुद्रिक बाटो तय गर्ने गरेका छन् ।
