अखिल नेपाल फुटबल संघका अध्यक्ष कर्मा छिरिङ शेर्पाले क्याम्पबाट भागेर नाइट पार्टीमा गएका खेलाडीलाई दक्षिण एसियाली खेलकुद प्रतियोगितामा पनि सहभागिता नगराइने बताएका छन् ।
कुवेतविरुद्धको खेल खेल्न भुटान जाने दिनको अघिल्लो रात यू–२३ टिमका डिफेन्डर दिनेश राजवंशी, मिडफिल्डर सन्तोष तामाङ र अञ्जन विष्ट तथा फरवार्ड विमल घर्ति मगर क्याम्पबाट भागेर ठमेल पुगेका थिए । त्यो थाहा पाएपछि उनीहरुलाई बर्खास्त गरिएको थियो ।
सन्तोष बाहेक अरु तीन जना खेलाडी साग खेल्ने यू–२३ टिममा समावेश थिए । उनीहरुलाई अब सागमा समावेश नगरिने अखिल नेपाल फुटबल संघका अध्यक्ष कर्मा छिरिङ शेर्पाले बताएका छन् ।
नेपाल–कुवेत खेल हेर्न भुटान गएका अध्यक्ष शेर्पा आज टिमसँगै नेपाल फर्किएका छन् । फर्किए लगत्तै शेर्पा दशरथ रंगशालाको निर्माण प्रगतिको निरिक्षणमा त्रिपूरेश्वर पुगेका थिए । रंगशालामा नेप्लेजसँग कुरा गर्दै अध्यक्ष शेर्पाले भने,‘साग कै क्याम्पबाट भागेर पार्टीमा जाने खेलाडीलाई साग खेल्न दिन मिल्दैन ।’
उनीहरुमाथि केही लामो कारवाही हुने संकेत अध्यक्ष शेर्पाले दिए । अहिले यो घटना अनुसन्धानको क्रममा छ । अनुसन्धानको प्रतिवेदन आएपछि एन्फाको बैठकले थप कारवाही सुनाउनेछ ।
