एजेन्सी । अमेरिकामा प्रहरीको गोली लागेर दुई जना अश्वेत व्यक्तिको मृत्यु भएपछि प्रदर्शन चर्किएको छ ।
एक जना अश्वेतलाई गोली प्रहार गरेको विरोधमा सुरू भएका प्रदर्शनका क्रममा विस्कन्सिन राज्यमा प्रहरीले चलाएको गोली लागि २ जनाको मृत्यु भएपछि त्यहाँ प्रदर्शन चर्किएको हो ।
प्रहरीको गोली लागी ज्याकोब ब्लेक नामका व्यक्ति गम्भीर घाइते भएको विरोधमा विस्कन्सिनको केनोसामा प्रदर्शन गरिएको हो । सामाजिक सञ्जालमा सार्वजनिक भिडियोमा एक कारमा आड लागेका २९ वर्षीय ब्लेकलाई कैयौं पटक गोली प्रहार गरिएको देखिएको थियो । गोली प्रहारका कारण उनमा पक्षघात भएको जनाइएको छ ।
ब्लेकलाई गोली हानिएपछि जारी प्रदर्शन हिंसात्मक भएपछि लगाइएको कर्फ्यूको उल्लंघन गर्दै स्थानीयले प्रदर्शन जारी राखेका छन् । प्रहरीको गोली लागी एक जना गम्भीर घाइते भएका छन् । स्थानीय सञ्चारमाध्यमका अनुसार एक पेट्रोल स्टेसनमा तैनाथ सुरक्षाकर्मी र प्रदर्शनकारीबीच हिंसात्मक झडपहरू भएका छन् ।
विस्कन्सिनका गभर्नर टोनी एभर्सले जारी प्रदर्शन रोक्न थप फौज परिचालन गरिएको जनाएका छन् । उनले स्थानीय प्रहरीलाई सहयोग गर्न नेसनल गार्डलाई बोलाइएको बताए । घटनापछि विस्कन्सिनमा आपत्काल घोषणा गरिएको छ ।
ओरिगनको पोर्टल्यान्ड तथा मिनिसाटाको मिनियापोलिससमेत प्रदर्शहरू सुरू भएका छन् । मिनियापोलिसमा प्रहरीको नियन्त्रणमा अश्वेत नागरिक जर्ज फ्लोइयडको मृत्यु भएपछि अमेरिकाव्यापी प्रदर्शन चर्केको थियो । त्यही प्रदर्शन मत्थर नहुँदै त्यहाँ फेरि अर्को प्रदर्शन सुरू भएको छ । यी प्रदर्शनहरू जातीय हिंसामा परिणत हुँदै जाँदा आउदो राष्ट्रपतीय निर्वाचन राष्ट्रपति डोनाल्ड ट्रम्पलाई अप्ठ्यारो पार्ने कारकसमेत बन्न सक्ने विश्लेषणहरू हुन थालेका छन् ।
