काठमाडौं । आगामी कात्तिकमा निक्षेप तथा ऋणको ब्याजदरबारे निर्णय गर्न नेपाल बैंकर्स संघको बैठक आज बिहीबार बस्दैछ । बैंकर्स संघ स्रोतका अनुसार आगामी महिना वाणिज्य बैंकहरुले कर्जाको ब्याजदर बढाउने सम्भावना छ ।
ब्याजको आधार दर बढाएर त्यसकै अनुपातमा कर्जाको पनि ब्याज दर पनि बढाउने तयारी संघको रहेको बुझिएको छ । आधार दर शून्य दशमलव ५ प्रतिशतले बढाएर कर्जाको ब्याज पनि सोही अनुपातमा बढाइने स्रोतको भनाइ छ ।
असोजमा वाणिज्य बैंकहरुको औसत आधार दर ९ दशमलव ५६ प्रतिशत रहेको छ । कतिपय बैंकहरुको भने आधार दर साढे १० प्रतिशत माथि रहेको छ ।
कर्जाको ब्याजदर बढाए पनि निक्षेपमा भने वाणिज्य बैंकहरुले ब्याजदर यथावत राख्ने भएका छन् ।
बैंक तथा वित्तिय संस्थाहरुले हरेक तीन महिनामा आधार दर हेरफेर गर्न पाउने नीतिगत ब्यवस्था अनुसार आधार दर बढाउन लागिएको हो ।
उद्योगी व्यवसायीहरुले कर्जाको ब्याज बढी भएको भन्दै हारगुहार गरिरहेको बेला बैंकहरुले पुनः कर्जाको ब्याज बढाउन लागेका हुन ।
सरकारले ब्याजदर निर्धारणबारे अध्ययन गर्न गठन गरेको कार्यदलले समेत ब्याजदरमा हस्तक्षेप गर्न नहुने सुझाव दिएकाले बैंक वित्तिय संस्थाहरुलाई ब्याज बढाउन बहाना भएको छ ।
