टोक्यो (रासस/एएफपी)– विश्वभरीका जीवित मानिसमध्ये सबैभन्दा जेष्ठ सदस्य जापानी नागरिकको ११७ वर्षको उमेरमा शनिबार निधन भएको छ ।
स्थानीय अधिकारीले एएफपी समाचार समितिलाई आइतबार सो जानकारी दिएका छन् ।
जापानी महिला नाबी ताजिमाको ११७ वर्षको उमेरमा शनिबार बेलुका झण्डै ८ बजेतिर निधन भएको स्थानीय सञ्चार माध्यमले आइतबार समाचार संप्रेषण गरेका छन् ।
उनको जन्म सन् १९०० को अगस्ट ४ का दिनमा भएको थियो । किकाइ द्विपको कागोसिमा क्षेत्रमा पर्ने अस्पतालमा उनको निधन भएको सरकारी स्वास्थ्य अधिकारीले जानकारी दिएका छन् ।
सन् २०१५ को सेप्टेम्बर महिनामा ताजिमा जापानको सबैभन्दा जेष्ठ नागरिक बनेकी थिइन् ।
‘गिनिस बुक अफ बल्ड रिकर्ड’का अनुसार यसअघि विश्वको नै जेष्ठ नागरिक जमाइकाका भोइलेन्ट ब्राउन सन् २०१७ को सेप्टेम्बरमा निधन भएपछि विश्वको सबैभन्दा जेष्ठ नागरिकको खोजी भएको र ताजिमा विश्वको सबैभन्दा जेष्ठ नागरिक बनेकी थिइन् ।
ताजिमाको निधनपछि विश्वकै अर्का जेष्ठ सदस्य पनि जापान कै नागरिक भएका छन् । झण्डै ११२ वर्षका मसाजो नोनाका अहिले जीवित नागरिकमध्ये सबैभन्दा जेष्ठ नागरिक बनेका हुन् ।
जापानमा धेरै नागरिक लामो उमेर बाच्ने गर्दछन् । झण्डै ६८ हजार जापानी नागरिक एक सय वर्षभन्दा बढी उमेरका सरकारी स्रोतले गत वर्ष नै जानकारी दिएको थियो ।
