एजेन्सी । अमेरिकामा कोरोनाका नयाँ संक्रमितको संख्या एकै दिन १० लाख पुगी नयाँ रेकर्ड राखेको सरकारी अधिकारीहरूले बताएका छन् । कोभिडको नयाँ भेरियेन्ट ओमिक्रोन फैलने क्रम जारी रहँदा आगामी दिनहरूमा अझ तीव्र रूपमा संख्या बढ्दै जाने बताइएको छ ।
डाटाका अनुसार सोमबार मात्र त्यहाँ १० लाख ८० हजारभन्दा बढी नयाँ संक्रमित थपिएका हुन्, त्यो विश्वकै सबैभन्दा उच्च रहेको जोन होप्किन्स युनिभर्सिटीले जनाएको छ । यसमा अधिकांश नयाँ बिरामीमा ओमिक्रोन भेरियेन्ट फेला परेको बताइएको छ ।
यसरी संक्रमण बढिरहँदा पनि स्कुलहरू खुलाएकोमा यति बेला राष्ट्रपति जो बाइडेन सबैतिरबाट आलोचित भइरहेका छन् । तर, नयाँ संक्रमित बढीरहेको भए पनि मृत्यु र अस्पताल भर्ना हुनेको दर भने पछिल्ला हप्ताहरूको तुलनामा एकदमै कम रहेको पाइएको छ ।
त्यस्तै भारतमा कोरोना भाइरस संक्रमितको संख्या बढ्दै गएको छ । पछिल्लो एक हप्तादेखि भारतमा दैनिक संक्रमितको संख्या बढ्दै गएको छ । पछिल्लो २४ घण्टामा ५८ हजार ९७ जनामा संक्रमण देखिएको छ ।
यस्तै थप ५३४ जना संक्रमितको मृत्यु भएको छ । भारतका कयौं राज्यमा ओमोक्रन भेरियन्ट फैलिएर संक्रमितको संख्या बढेसँगै प्रतिबन्धहरु लगाउन सुरु गरिएको छ । भारतको २३ राज्यहरुमा ओमोक्रनको १८०० भन्दा बढी केसहरु पुष्टि भइसकेको छ । दिल्लीमा मात्रै दुई हप्तायता ४५ प्रतिशत केस बढेको छ ।
यसैबीच, भारतको राजधानी नयाँ दिल्लीमा साताको २ दिन शनिवार र आइतबार कर्फ्यू लगाईने भएको छ । कोरोना संक्रमण बढेका कारण लगाउन थालिएको रात्रीकालीन कर्फ्यू जारी रहेकै बेला साताको २ दिन कर्फ्यू लगाउने निर्णय गरिएको हो ।
यस्तै, निजी कम्पनीहरुलाई पनि ५० प्रतिशत कमर्चारीलाई घरबाटै काममा लगाउन भनिएको छ । अरु कयौं राज्यहरुले पनि रात्रिकालीन कर्फ्यू लगाउनुका साथै भिडभाड गर्न प्रतिबन्ध लगाएको छ ।
कोरोना हटस्पट नै बनेको महाराष्ट्रमा पनि ओमोक्रनको प्रभाव बढ्दो छ । १० हजार सक्रिय संक्रमित रहेको यो राज्यमा ५०० भन्दा बढी ओमोक्रन संक्रमित रहेका छन् ।
